ბათუმის შოთა რუსთაველის სახელმწიფო უნივერსიტეტში ჟან მონეს საზაფხულო სკოლა „კონსტიტუციური დემოკრატია ევროპის კავშირში: ძირითადი გამოწვევები და საქართველო“ გაიხსნა. საზაფხულო სკოლა ბსუ-ს რექტორმა, პროფესორმა მერაბ ხალვაშმა, ჟან მონეს კათედრის ხელმძღვანელმა, პროფესორმა მალხაზ ნაკაშიძემ, იურიდიული და სოციალურ მეცნიერებათა ფაკულტეტის დეკანმა ლევან ჯაყელმა და ნატოსა და ევროკავშირის საინფორმაციო ცენტრის აჭარის რეგიონულმა წარმომადგენელმა ირმა გაბინაშვილმა გახსნეს.

ბათუმის შოთა რუსთაველის სახელმწიფო უნივერსიტეტის სტუდენტებისათვის ნიუ ვიჟენ უნივერსიტეტის იურიდიული ეთიკის მიმართულება იურიდიული ეთიკის ინტენსიურ კურსს (crash course) ატარებს. კურსი (crash course) მიზნად ისახავს, დაეხმაროს სტუდენტებს გააცნობიერონ ადვოკატირების პროცესში გადაწყვეტილების მიღების ეთიკური განზომილება და დაეხმაროს მათ დამოუკიდებლად დასახონ იმ პოტენციური ეთიკური საკითხების მართვის გზები, რომლებსაც ისინი შეხვდებიან პრაქტიკაში. სწავლების პროცესს უძღვებიან ნიუ ვიჟენ უნივერსიტეტისა და ბათუმის შოთა რუსთაველის სახელმწიფო უნივერსიტეტის პროფესორ-მასწავლებლები.

დასრულდა საზაფხულო სკოლა „კონსტიტუციური მართლმსაჯულების აქტუალური საკითხები". საზაფხულო სკოლაში ორი კვირის განმავლობაში მონაწილეობა მიიღეს საქართველოს სხვადასხვა უნივერსიტეტის სამართლის საბაკალავრო და სამაგისტრო პროგრამის სტუდენტებმა. საზაფხულო სკოლის ფარგლებში გაიმართა საგანმანათლებლო ვიზიტი საქართველოს საკონსტიტუციო სასამართლოში და სკოლის მონაწილეებს გადაეცათ შესაბამისი სერტიფიკატები.

საზაფხულო სკოლის „კონსტიტუციური მართლმსაჯულების აქტუალური საკითხები" მეორე ეტაპი დაიწყო. ბათუმის შოთა რუსთაველის სახელმწიფო უნივერსიტეტისა და საქართველოს უნივერსიტეტის პროფესორები, ხუთი დღის განმავლობაში საქართველოს სხვადასხვა უნივერსიტეტის სტუდენტებს ლექციებს წაუკითხავენ საკონსტიტუციო კონტროლის თეორიულ ასპექტებზე, სასამართლოს სტრუქტურაზე, საქართველოს საკონსტიტუციო სასამართლოს სამართლებრივ ბუნებაზე, საერთაშორისო ხელშეკრულებათა და შეთანხმებათა შემოწმებაზე, ადამიანის ძირითად უფლებათა დაცვის ევროპულ მექანიზმებზე, საკონსტიტუციო სამართალწარმოების სტადიებზე. მომავალი იურისტები ასევე, კონსტიტუციური სარჩელის წერის მეთოდიკასა და საკონსტიტუციო სასამართლოს სპეციფიკას პრაქტიკული სავარჯიშოებით გაეცნობიან.

ბსუ-ს იურიდიული და სოციალურ მეცნიერებათა ფაკულტეტისა და ორგანიზაციის „სამოქალაქო საბჭო თავდაცვის და უსაფრთხოების საკითხებში“ ორგანიზებით გაიხსნა მეშვიდე საზაფხულო უნივერსიტეტი „ბირთვული უსაფრთხოება და გაუვრცელებლობა“ თემაზე: „რუსეთის შეჭრა უკრაინაში, ახალი გამოწვევები და რისკები ბირთვული უსაფრთხოებისა და გაუვრცელებლობის რეჟიმისათვის“. საზაფხულო უნივერსიტეტი გახსნეს ბსუ-ს რექტორის მოადგილემ თამარ სირაძემ, ნიდერლანდების სამეფოს ელჩმა საქართველოში მააიკე ვან კოლდამმა და თავდაცვისა და უსაფრთხოების სამოქალაქო საბჭოს დამფუძნებელმა შორენა ლორთქიფანიძემ.