11 ივნისს ევროპის იურისტ სტუდენტთა ასოციაცია საქართველო UNICEF-ის საქართველოს წარმომადგენლობასა და საქართველოს პროკურატურასთან თანამშრომლობით Google Meeting-ის საშუალებით ატარებს კონფერენციას ბავშვთა უფლებების შესახებ. გაეროს ბავშვთა ფონდის წარმომადგენელი საქართველოში, დოქტორ ღასან ხალილი, გაეროს ბავშვთა ფონდის მართლმსაჯულების პროგრამის ხელმძღვანელი თეონა კუჭავა და პროკურორი ია ჩხეიძე მოხსენებებს წარმოადგენენ ბავშვთა უფლებების დაცვის აქტუალურ საკითხებზე. ღონისძიებაზე დასწრების შესაძლებლობა აქვთ საქართველოს აკრედიტებული უმაღლესი სასწავლებლების იურიდიული ფაკულტეტის ბაკალავრიატის, მაგისტრატურისა და დოქტორანტურის ნებისმიერი კურსის სტუდენტებსა და კურსდამთავრებულებს.

ბათუმის შოთა რუსთაველის სახელმწიფო უნივერსიტეტის ჟან მონეს კათედრის ხელმძღვანელმა მალხაზ ნაკაშიძემ დაბა ქედის საჯარო სკოლაში საჯარო ლექცია ჩაატარა თემაზე „ევროპის კავშირის ფუნდამენტური ღირებულებები - დემოკრატია, კანონის უზენაესობა და ადამიანის უფლებები”. ლექცია მოიცავდა ისეთ საკითხებს, როგოროცაა: ევროკავშირის დამფუძნებელი პრინციპები, მიზნები, ღირებულებები, ევროკავშირის ინსტიტუტები, ადამიანის უფლებების დაცვის ევროპული მექანიზმები, დემოკრატიიის გამოწვევები და საქართველოს ევროკავშირში ინტეგრაციის პროცესი.

ბათუმის შოთა რუსთაველის სახელმწიფო უნივერსიტეტში, იურიდიული და სამართალმცოდნეობის ფაკულტეტზე ორგანიზაცია „მწვანე სექტორის“ ინიციატივით და USAID/PROLoG-ის მხარდაჭერით, იურიდიული კინოკლუბი გაიხსნა. ახალი საინფორმაციო სივრცე ხელს შეუწყობს სასწავლო პროცესში კინოს, როგორც შემეცნებითი რესურსის, აქტიურ გამოყენებას. კინოკლუბი შესაძლებლობას მისცემს სამართალმცოდნეობის სპეციალობის სტუდენტებს, ინტერაქტიულ რეჟიმში განიხილონ მხატვრულ ფილმებში წარმოჩენილი სამართლებრივი და სოციალური საკითხები, იმსჯელონ დემოკრატიულ იდეებისა და ლიბერალური ღირებულებების შესახებ, გამართონ საჯარო დისკუსიები და გაუზიარონ ერთმანეთს შეხედულებები.

ბათუმის შოთა რუსთაველის სახელმწიფო უნივერსიტეტის იურიდიული და სოციალურ მეცნიერებათა ფაკულტეტის სოციალური დეპარტამენტის პროფესორმა ეთერ ვარშანიძემ და ფსიქოლოგიის პროგრამის სტუდენტებმა ბავშვთა დაცვის დღესთან დაკავშირებით, 1-4 ივნისს, ბათუმის რესპუბლიკურ კლინიკურ საავადმყოფოში ბავშვებსა და მშობლებს უფასო კონსულტაცია გაუწიეს. კონსულტაცია ითვალისწინებდა ისეთი აქტუალური საკითხების გაცნობას, როგორიცაა: ბავშვების აღზრდა პოზიტიურად, მშობელსა და შვილს შორის არსებული კონფლიქტის მოგვარების გზები.

ბსუ-ს იურიდიული და სოციალურ მეცნიერებათა ფაკულტეტის სამართალმცოდნეობის I კურსის სტუდენტების პროექტი „ფერადი უსაფრთხოება" სტუდენტთა სამოქალაქო ჩართულობის პროექტების კონკურსის გამარჯვებულია. მომავალმა სამართალდამცავებმა წარმატებას USAID-ისა და IFES-ის მიერ მხარდაჭერილი „დემოკრატია და მოქალაქეობის’’ საუნივერსიტეტო კურსის ფარგლებში განხორციელებულ სტუდენტთა სამოქალაქო ჩართულობის პროექტების კონკურსში მოიპოვეს. მასში ქვეყნის 30-მდე უმაღლესი საგანმანათლებლო დაწესებულება მონაწილეობდა. საქართველოში საუკეთესო საზოგადოებრივი ჩართულობის პროექტი პირველკურსელმა სტუდენტებმა: ნიკა ინაიშვილმა, ცოტნე ქართველიშვილმა, ნონა კოჩალიძემ, ნიკა მამულაძემ და ხატია ლეონიძემ კარანტინის პერიოდში ბსუ-ს ლექტორის ზურა კვირკვაიას ხელმძღვანელობით განახორციელეს. „ფერადი უსაფრთხოება" მიზნად ისახავდა საგზაო უსაფრთხოების წესების დაცვის ხელშეწყობას, ცნობიერებისა და საზოგადოებრივი პასუხისმგებლობის ამაღლებას.