10 ოქტომბერს, 15:00 საათზე, ბათუმის შოთა რუსთაველის სახელმწიფო უნივერსიტეტის თავისუფალ სივრცეში (აუდიტორია #21), გიგა ფარტენაძე ღია ლექციას წაიკითხავს თემაზე: „სოციალური ქსელი, როგორც პოლიტიკური ბრძოლის იარაღი“. ასევე შედგება ფილმის ჩვენება და დისკუსია თემებზე: „აშშ-ის საპრეზიდენტო არჩევნები“ და „ბრექსიტი“.

4-5 ოქტომბერს ექსპერტებმა: თეა აქუბარდიამ, ვასილ სიხარულიძემ, გიორგი თარგამაძემ ბათუმის შოთა რუსთაველის სახელმწიფო უნივერსიტეტში ტრენინგი ჩაატარეს თემაზე: „ეროვნული უსაფრთხოების გამოწვევები“. ინტენსიურ ორდღიანი სასწავლო კურსი მიზნად ისახავდა ბსუ-ს იურიდიული და სოციალურ მეცნიერებათა ფაკულტეტების პროფესორებისა და სტუდენტების კომპეტენციის ამაღლებას ეროვნული უსაფრთხოების, ეროვნული თავდაცვის პოლიტიკისა და სტრატეგიული კომუნიკაციის ანალიზის საკითხებში. ტრენინგი განხორციელდა პროექტის „ქალები ეროვნულ უსაფრთხოებაში“ ფარგლებში, რომელიც ითვალისწინებს საქართველოში ეროვნული უსაფრთხოების სფეროში სასწავლო და კვლევითი შესაძლებლობების გაძლიერებას.

ევროპული მემკვიდრეობის დღეებისადმი მიძღვნილ ღონისძიებების ფარგლებში აჭარის ხარიტონ ახვლედიანის სახელობის მუზეუმში ჩატარდა საჯარო ლექცია „ბათუმი - ქართული ევროპული ქალაქი“. მუზეუმის დირექტორმა სულხან ოქროპირიძემ ბათუმის შოთა რუსთაველის სახელმწიფო უნივერსიტეტის საერთაშორისო ურთიერთობების და ევროპისმცოდნეობის სპეციალობის სტუდენტებს ისეთი აქტუალური საკითხი გააცნო, როგორიცაა XIX-XX საუკუნის მიჯნაზე ბათუმში მოქმედი საკონსულოები და ცნობილი ევროპელების კავშირები ბათუმთან. ლექციის მიზანი იყო სამუზეუმო ექსპონანტების და დოკუმენტების ჩვენებით ბათუმის როგორც ევროპული ქალაქის სახის წარმოჩენა.

წარმატებით გაიარა პროგრამული აკრედიტაცია ბათუმის შოთა რუსთაველის სახელმწიფო უნივერსიტეტის იურიდიული და სოციალურ მეცნიერებათა ფაკულტეტის საჯარო მმართველობის საბაკალავრო საგანმანათლებლო პროგრამამ. ვულოცავთ ფაკულტეტის სტუდენტებსა და პროფესორ-მასწავლებლებს ამ მნიშვნელოვან გამარჯვებას.

ბათუმის შოთა რუსთაველის სახელმწიფო უნივერსიტეტში საჯარო ლექცია გაიმართა თემაზე: „ბიოსინთეზი - როგორც სხეულზე ორიენტირებული ფსიქოთერაპიული მიმართულება“. ფსიქოლოგმა, სხეულზე ორიენტირებული ფსიქოთერაპიის ევროპული ასოციაციის წევრმა, სხეულზე ორიენტირებული ფსიქოთერაპიის ევროპული ასოციაციის წევრმა, საქართველოში ბიოსინთეზის პროგრამის კურატორმა გერლინდა ბუხჰოლცმა სტუდენტებს სხეულზე ორიენტირებული ფსიქოთერაპიის აქტუალური საკითხები გააცნო. საჯარო ლექციის დასრულების შემდეგ დისკუსია გაიმართა და გერლინდა ბუხჰოლცმა ახალგაზრდების შეკითხვებს უპასუხა.