მასწავლებელთა გაცვლითი პროგრამის- „Agir ABCD”- ის ფარგლებში ბათუმის შოთა რუსთაველის სახელმწიფო უნივერსიტეტს ფრანგი მასწავლებელი ფრანსუაზა ლენოტრი ეწვია. მოწვეული მასწავლებელი 3 თვის განმავლობაში პრაქტიკულ მეცადინეობებს ჩაუტარებს ფრანგული ფილოლოგიის (ძირითადი და დამატებითი) სპეციალობის სტუდენტებს. ამასთანავე, ის გამოცდილებას გაუზიარებს ლექტორ-მასწავლებლებს უცხოური ენის სწავლების თანამედროვე მეთოდებში.

3 მარტს, ილიას უნივერსიტეტის პროფესორი მამუკა ნადარეიშვილი, ბათუმის შ/რ სახელმწიფო უნივერსიტეტის სოციოლოგიის სპეციალობის მაგისტრანტებს შეხვდა. შეხვედრის ძირითადი თემა სოციალური დახმარების სისტემის დღევანდელი მდგომარეობის ანალიზი გახლდათ. თუმცა, საუბრისას, ყურადღების მიღმა არ დარჩენილა ისეთი საკითხები, როგორიცაა: საქართველოში სოციალური დახმარების სისტემის ჩამოყალიბებისა და განვითარების პერიოდის მიმოხილვა, სოციალური დახმარების მიმღებთა მდგომარეობისა და დახმარების მიღების მსაზღვრელების გაანალიზება, სოციალური დახმარების გაცემასთან დაკავშირებული სირთულეების განსაზღვრა. აღნიშნული ტიპის შეხვედრები სტუდენტთა ინფორმაციული დონისა და პრაქტიკული თვალსაწიერის გამდიდრებას უწყობს ხელს.

შოთა რუსთაველის სახელმწიფო უნივერსიტეტმა ბათუმის საჯარო და კერძო სკოლებში ღია კარის დღეები დაიწყო. უმაღლესი საგანმანათლებლო დაწესებულების პროფესორ-მასწავლებლები და სტუდენტები აბიტურიენტებისათვის პრეზენტაციებს მართავენ. მეთორმეტე კლასის მოსწავლეები უნივერსიტეტში სწავლების პირობებს, საგანმანათლებლო პროგრამებს, სტიპენდიებს, სოციალური და გაცვლით პროგრამებს, სამეცნიერო-კვლევითი საქმიანობას, სტუდენტური ცხოვრებასა და სიახლეებს ეცნობიან. მომავალ სტუდენტებს უნივერსიტეტის შესახებ დეტალური ინფორმაციის მისაღებად ბუკლეტები და საჩუქრები გადაეცემათ.
ღია კარის დღეები ბათუმის სკოლების შემდეგ აჭარის რაიონებში, სამეგრელოსა და გურიის რეგიონებში გაგრძელდება.

შოთა რუსთაველის პოემა 50 ენაზეა თარგმნილი და 37 ქვეყანაშია დაბეჭდილი. 17 თებერვალს ბათუმის შოთა რუსთაველის სახელმწიფო უნივერსიტეტის რუსთაველის დარბაზში გაიმართა “ვეფხისტყაოსნის” ახალი რუსული თარგმანის პრეზენტაცია. მთარგმნელი არჩილ ხალვაში (1935-2008) ბათუმის პედაგოგიური ინსტიტუტის კურსდამთავრებულია და პროექტზე რვა წელი მუშაობდა. ახალ თარგმანში ზუსტადაა დაცული „ვეფხისტყაოსნის” მეტრი: მაღალი და დაბალი შაირი, 20-მარცვლოვანი ლექსი. გარდა ამისა, უცხო ენაზე პირველად ითარგმნა და გამოქვეყნდა „ვეფხისტყაოსნის” სრული რედაქცია: შოთა რუსთაველის ავთენტურ ტექსტთან ერთად თარგმანში შევიდა ჩანართი და დანართი სტროფები, ანუ პოემის გაგრძელებები. გამოცემა ბილინგვურია, რუსულ ტექსტს ახლავს ქართული დედანი, რომელშიც შოთა რუსთაველის ”ვეფხისტყაოსნის” ტექსტი ემყარება აკადემიურ გამოცემებს (1988 და 2009 წ.), ხოლო ჩანართი-დანართი სტროფები - კრიტიკულად დადგენილ ტექსტს, რომელიც მთარგმნელს ეკუთვნის. გამოცემა დასაბეჭდად მოამზადა ბსუ ქართული ფილოლოგიის დეპარტამენტის პროფესორმა რამაზ ხალვაშმა, რომელსაც ეკუთვნის ვრცელი წინასიტყვაობები რუსულ და ქართულ ენებზე. წიგნის გამომცემელია მთარგმნელის ვაჟი - ემზარ ხალვაში. წიგნი დაისტამბა გამომცემლობა ”ქართულ წიგნში”.

ჰუმანიტარულ მეცნიერებათა ფაკულტეტზე პირველკურსელებთან შეხვედრა ჩატარდა მათი საგანმანათლებლო პროგრამებზე გადანაწილების მიზნით. პირველკურსელებს შეხვდნენ ფაკულტეტის დეკანი, პროფ. მ. გიორგაძე, დეპარტამენტის ხელმძღვანელები და საგანმანათლებლო პროგრამების ხელმძღვანელები, რომლებმაც სტუდენტებს ფაკულტეტის საგანმანათლებლო პროგრამები გააცნეს და მათ შეკითხვებს უპასუხეს. შეხვედრის ბოლოს პირველკურსელებმა მათთვის სასურველი არჩევანი ფაკულტეტზე მოქმედ ათ საბაკალავრო საგანმანათლებლო პროგრამას შორის გააკეთეს (ქართული ფილოლოგია, ისტორია, ფილოსოფია, თარგმანმცოდნეობა, თურქეთისმცოდნეობა, თურქული ფილოლოგია, რუსული ფილოლოგია, ინგლისური ფილოლოგია, გერმანული ფილოლოგია, ფრანგული ფილოლოგია).