18-19 აპრილს ჰუმანიტარულ მეცნიერებათა ფაკულტეტის ინიცირებითა და უნივერსიტეტის ხარისხის უზრუნველყოფის სამსახურის ორგანიზებით, ბსუ-ს პროფესორ- მასწავლებლებისა და სტუდენტებისათვის ჩატარდა ტრენინგი თემაზე: „სამეცნიერო ონლაინ-რესურსები და საერთშორისო მაღალრეიტინგულ ჟურნალებში სტატიების გამოქვეყენება“. ტრენინგს უძღვებოდა აღმოსავლეთ ევროპის უნივერსიტეტის ვარლამ ჩერქეზიშვილის სახელობის ინტერდისციპლინური კვლევების ცენტრის ხელმძღვანელი, პროფესორი გიორგი თავაძე. ტრენინგ-პროგრამის ფარგლებში მონაწილეები გაეცნენ ჰუმანიტარული მეცნიერებების მიმართულებებით არსებულ სამეცნიერო ბაზებს, ელექტრონულ კატალოგებთან მუშაობის წესებს, სამეცნიერო ინსტიტუტების, გამომცემლობებისა და სხვა სამეცნიერო ინტერნეტ-რესურსების მოძიების ხერხებსა და იქ არსებული ინფორმაციის დამუშავების მეთოდებს.

ბათუმის შოთა რუსთაველის სახელმწიფო უნივერსიტეტი გაერთიანდა ჟურნალიზმის სწავლების ევროპულ ასოციაციაში (EJTA), რომლის ფარგლებშიც „ციფრული მედიისა და ინოვაციების“ სამაგისტრო პროგრამის სტუდენტები ელიზა ეფაძე და ანა ბაჟუნაიშვილი მონაწილეობდნენ FEJS –ის ყოველწლიურ საერთაშორისო სტუდენტურ ფორუმში. კონგრესს 12-18 აპრილს სლოვენიის დედაქალაქი ლუბლიანა მასპინძლობდა და მასში ევროპის თითქმის ყველა ქვეყნის მედიასკოლის სტუდენტი მონაწილეობდა. საერთაშორისო სტუდენტური ფორუმი ითვალისწინებდა თეორიულ და პრაქტიკულ ვორქშოფებს, რომლებზეც სტუდენტებმა აქტიურად განიხილეს თანამედროვე მედიის გამოწვევები და პრობლემები, არის თუ არა მედია დამოუკიდებელი, ობიექტური და როგორ უნდა ვებრძოლოთ მედიაპოლარიზებას, ასევე კიბერთავდასხმებსა და ე.წ Fake news.

ქართული ენის დღე ბათუმის შოთა რუსთაველის სახელმწიფო უნივერსიტეტში კვირეულით აღინიშნება. ჰუმანიტარულ მეცნიერებათა ფაკულტეტის სტუდენტების მონაწილეობით სამეცნიერო კონფერენცია ჩატარდა. კონფერენციაზე მომხსენებლებმა ქართული ენისა და ლიტერატურის აქტუალურ საკითხებსა და პრობლემატიკაზე იმსჯელეს. აკაკი წერეთლის სახელობის ბათუმის საჯარო ბიბლიოთეკაში მამია ფაღავას, მერი ცინცაძისა და მაია ბარამიძის მონოგრაფიის „ქართული ენის შავშური დიალექტი“ (გამოკვლევა, მასალები, ლექსიკონი) წარდგენა გაიმართა.

ბათუმის შოთა რუსთაველის სახელმწიფო უნივერსიტეტში 9 აპრილისადმი მიძღვნილი დისკუსია გაიმართა თემაზე: „9 აპრილიდან 9 აპრილამდე“. სტუდენტებმა, პროფესორ-მასწავლებლებმა, ბათუმის ელიტური სკოლა „გორდას“, სკოლა „მონპარნასის“ პედაგოგებმა და მოსწავლეებმა 1989 წლის 9 აპრილს საქართველოს დამოუკიდებლობისათვის დაღუპული გმირები გაიხსენეს და 34 წლის წინ განვითარებულ მოვლენებზე იმსჯელეს. დისკუსიას მოდერატორობას უწევდნენ ბსუ-ს პროფესორები ჯემალ კარალიძე, ოთარ გოგოლიშვილი, ისტორიის დოქტორი ხათუნა დუმბაძე და ისტორიის საგანმანათლებლო პროგრამის მესამე კურსის სტუდენტი მარიამ ჭანკურიძე.

ფრანკოფონიის დღეების ფარგლებში, ბათუმის შოთა რუსთველის სახელმწიფო უნივერსიტეტში სტუდენტთა კონფერენცია „ფრანგული კულტურა და ცივილიზაცია“ გაიმართა. კონფერენციაზე უნივერსიტეტის ფრანკოფონმა სტუდენტებმა პრეზენტაციები წარმოადგინეს ფრანგული კულტურისა და ცივილიზაციის შესახებ. სესიაზე ბსუ-ს კურსდამთავრებულმა, მთარგმნელმა სოფიო ბარშოვამ ღონისძიების მონაწილეებს თავისი თარგმანები გააცნო და ისაუბრა თანამედროვე ფრანგული მხატვრული ნაწარმოებების თარგმანის შესახებ. კონფერენციას პროფესორ-მასწავლებლები, სტუდენტები და ქართულ-ამერიკული სკოლის მოსწავლეები ესწრებოდნენ.