8-9 ივნისს, ბათუმის შოთა რუსთაველის სახელმწიფო უნივერსიტეტში ფრანგულ-გერმანული კინოს დღეები გაიმართა. ღონისძიების ფარგლებში შედგა თანამედროვე ფრანგული და გერმანული ფილმების: „პაპიშა“ „უხილავები“ „ტრანზიტი”და „ტონი ერდმანი“ ჩვენება. ღონისძიების დასრულების შემდეგ სტუდენტებმა და პროფესორ-მასწავლებლებმა უცხოელ ექსპერტებთან ერთად ფილმები შეაფასეს და მათში ასახულ მნიშვნელოვან და აქტუალურ თემებზე ისაუბრეს. კინოს დღეები საქართველოს ფრანგული ინსტიტუტისა და საქართველოში გოეთეს ინსტიტუტის ორგანიზებით გაიმართა.

„Erasmus+”-ის ინსტიტუციური განვითარების პროექტის - „რეგიონული უნივერსიტეტების როლი რეგიონის განვითარებაში” (RURD – role of universities in the regional development), მკვლევარმა, პროფესორმა მარინა გიორგაძემ ბსუ-ს ჰუმანიტარულ მეცნიერებათა ფაკულტეტის აკადემიური პერსონალისთვის ტრენინგი ჩაატარა ტემაზე: „უნივერსიტეტის მისია, სტრატეგიული განვითარების გეგმა და საგანმანათლებლო პროგრამების მიზნები და შედეგები". მონაწილეები გაეცნენ ბსუ-ს მისიას, სტრატეგიული განვითარების გეგმას და მათთან საგანმანათლებლო პროგრამების მიზნებისა და შედეგების შესაბამისობის საკითხებს. პროექტში საქართველოს 11 უნივერსიტეტთან ერთად ჩართულია ევროპის (ლიეტუვა, ესპანეთი, ავსტრია, ჩეხეთი) უნივერსიტეტები. ევროპულ უნივერსიტეტებთან თანამშრომლობის საფუძველზე, პროექტის ფარგლებში, მომზადდა LLL კურსი.

ბათუმის შოთა რუსთაველის სახელმწიფო უნივერსიტეტში საქართველოს სახელმწიფოებრივი დამოუკიდებლობის აღდგენის დღისადმი მიძღვნილი კონფერენცია და ფოტოგამოფენა გაიმართა. კონფერენციის მონაწილეებს მიესალმა და საქართველოს დამოუკიდებლობის აღდგენის დღე მიულოცა ბსუ-ს რექტორმა, პროფესორმა მერაბ ხალვაშმა. სამეცნიერო სესიაზე ბსუ-სა და სხვადასხვა უმაღლესი საგანმანათლებლო დაწესებულების პროფესორ-მასწავლებლებმა მოხსენებები წარმოადგინეს საქართველოს სახელმწიფოებრივი დამოუკიდებლობის აღდგენის აქტუალურ საკითხებზე და 104 წლის წინ განვითარებულ მოვლენებზე იმსჯელეს.

ჰუმანიტარულ მეცნიერებათა ფაკულტეტის სტუდენტებმა ექვსი სახელობითი სტიპენდია მოიპოვეს. ისტორიის სამაგისტრო საგანმანათლებლო პროგრამის მე-2 სასწავლო წლის სტუდენტი ანა ბაგრატიონი სელიმ ხიმშიაშვილის სახელობის სტიპენდიის მფლობელი გახდა, ისტორიის სამაგისტრო საგანმანათლებლო პროგრამის მე-2 სასწავლო წლის სტუდენტი გიორგი ბაციკაძე დავით ხახუტაიშვილის სახელობის სტიპენდიის, ინგლისური ფილოლოგიის საბაკალავრო საგანმანათლებლო პროგრამის მე-4 სასწავლო წლის სტუდენტი ხატია თხილაიშვილი აბელ სურგულაძის სახელობის სტიპენდიის, ინგლისური ფილოლოგიის საბაკალავრო საგანმანათლებლო პროგრამის მე-3 სასწავლო წლის სტუდენტი ცირა კახაძე როლანდ კომახიძის სახელობის სტპიპენდიის. ავთანდილ ბარათაშვილის სახელობის სტიპენდია ქართული ფილოლოგიის სპეციალობის მე-2 კურსის სტუდენტ სალომე აბაშიძეს გადაეცემა, ხოლო ცირა ჭყონიას სახელობითი სტიპენდია ინგლისური ფილოლოგიის საბაკალავრო საგანმანათლებლო პროგრამის მე-4 სასწავლო წლის სტუდენტ ანა გრიგორიანს.

ბათუმის შოთა რუსთაველის სახელმწიფო უნივერსიტეტში განხორციელება დაიწყო ბულგარეთის რესპუბლიკის საგარეო საქმეთა სამინისტროს მიერ დაფინანსებულმა პროექტმა „ბულგარული გამოცდილების გაზიარება ბათუმის შოთა რუსთაველის სახელმწიფო უნივერსიტეტში“, რომლის ფარგლებშიც დაგეგმილია სხვადასხვა სასწავლო და სამუშაო აქტივობის განხორციელება ახალი სამაგისტრო პროგრამის „ციფრული მედია და ინოვაციები“ გასაძლიერებლად.