ჰუმანიტარულ მეცნიერებათა ფაკულტეტის ორგანიზებით გაიმართა ქართული ფილოლოგიის დეპარტამენტის ასოცირებული პროფესორის, პრემია „საბას“ ლაურეატის (2017წ.), ნანა ტრაპაიძის, წიგნის - ,ლიტერატურა ლიტერატურის შესახებ" - პრეზენტაცია. წიგნი 2020 წელს გამოსცა ბათუმის შოთა რუსთაველის სახელმწიფო უნივერსიტეტის გამომცემლობამ.
როგორც ავტორი აღნიშნავს წინასიტყვაობაში, წიგნი ლიტერატურათმცოდნეობის შესავალი კურსისთვის ჩაფიქრებული სახელმძღვანელოს პირველი ნაწილია და პროპედევტიკული ფუნქცია აქვს ჰუმანიტარული ფაკულტეტის სასწავლო პროგრამებისთვის, რომლებიც ლიტერატურის თეორიის, ლიტერატურის სოციოლოგიის, ფილოსოფიის, ქართული და საზღვარგარეთის ლიტერატურის ისტორიის კურიკულუმებს აერთიანებს“.

ბსუ-ს ჰუმანიტარულ მეცნიერებათა ფაკულტეტის ასოცირებულმა პროფესორმა ივდით დიასამიძემ მონაწილეობა მიიღო „ერაზმუს+“-ის მოკლევადიან გაცვლით პროგრამაში (KA107 ERASMUS+ Programme – International Credit Mobility PEERS) და 2021 წლის 22-26 ნოემბერს, ქალაქ ბრაგაში (პორტუგალია), მინიოს უნივერსიტეტში ლექციები ჩაატარა. ასოცირებულმა პროფესორმა ივდით დიასამიძემ განათლების ფაკულტეტის მაგისტრატურის საგანმანათლებლო პროგრამის სტუდენტებს გააცნო ისეთი აქტუალური საკითხები, როგორიცაა: განსხვავებული მიდგომები ვიზუალურ ენასთან მიმართებაში; ვიზუალური ხერხები მხატვრულ ლიტერატურაში (საბავშვო ლიტერატურაში); მკითხველამდე მთავარი სათქმელის მიტანის ვიზუალური ხერხები; ინგლისური ენის კრეატიულად სწავლება.

ფილოსოფიის საერთაშორისო დღე ბათუმის შოთა რუსთაველის სახელმწიფო უნივერსიტეტში ცნობილი ქართველი ფილოსოფოსის, პროფესორ მიხეილ მახარაძის 75 წლის იუბილესადმი მიძღვნილი საერთაშორისო სამეცნიერო კონფერენციით „თანამედროვე ფილოსოფიის პრობლემები“ აღინიშნა. სესიის მონაწილეებმა ღვაწლმოსილ მეცნიერს იუბილე მიულოცეს, წარმატებები უსურვეს და მის ღვაწლზე ისაუბრეს. ბსუ-ს რექტორმა, პროფესორმა მერაბ ხალვაშმა მიხეილ მახარაძეს მადლობის სიგელი გადასცა განათლებისა და მეცნიერების სფეროში ხანგრძლივი ნაყოფიერი საქმიანობისა და მომავალი თაობების აღზრდაში შეტანილი განსაკუთრებული წვლილისათვის. სამეცნიერო კონფერენციაში ქართველმა და უცხოელმა ფილოსოფოსებმა სამეცნიერო მოხსენებები წარმოადგინეს დარგის აქტუალურ საკითხებზე. სამეცნიერო სესია იუნესკოს პროგრამის ფარგლებში გაიმართა.

ბათუმის შოთა რუსთაველის სახელმწიფო უნივერსიტეტის ჰუმანიტარულ მეცნიერებათა ფაკულტეტს სუმის მაკარენკოს სახელობის პედაგოგიურ უნივერსიტეტის დელეგაცია ეწვია უნივერსიტეტის სასწავლო-სამეცნიერო ინსტიტუტის დირექტორის, სუმის საოლქო რადას დეპუტატ იულია პოდრეზის ხელმძღვანელობით. შეხვედრაზე მხარეებმა განიხილეს ბსუ-სა და სუმის უნივერსიტეტებს შორის სასწავლო და სამეცნიერო თანამშრომლობის გაღრმავების, სტუდენტთა და პროფესორ-მასწავლებელთა გაცვლის საკითხები. ვიზიტი ბათუმის შოთა რუსთაველის სახელმწიფო უნივერსიტეტსა და სუმის მაკარენკოს სახელობის პედაგოგიურ უნივერსიტეტს შორის გაფორმებული მემორანდუმის ფარგლებში შედგა.

ბსუ-ს ჰუმანიტარულ მეცნიერებათა ფაკულტეტის სტუდენტებისა და პროფესორ-მასწავლებლებისათვის გაიმართა პროექტის „საქართველოს მომავალი’’ პრეზენტაცია. ღონისძიებაზე წარმოდგენილი იყო პუბლიკაცია „ბრძოლა და მსხვერპლშეწირვა: საქართველოს უახლესი ისტორიის ნარატივები’’. პროექტი მიზნად ისახავს ქართულ საზოგადოებაში სოციალური ტრანსფორმაციის ცალკეული ასპექტების სიღრმისეულ ანალიზსა და საჯარო სივრცეში დისკუსიის ხელშეწყობას. პროექტი „საქართველოს მომავალი’’ ხორციელდება კარნეგის ფონდის ევროპის ოფისისა და ლევან მიქელაძის ფონდის მიერ შვედეთის სამთავრობო ოფისისა და ფინეთის საგარეო საქმეთა სამინისტროს ფინანსური მხარდაჭერით.