ბათუმის შოთა რუსთაველის სახელმწიფო უნივერსიტეტის ჰუმანიტარულ მეცნიერებათა ფაკულტეტის აღმოსავლეთმცოდნეობის დეპარტამენტში გამოიცა სამეცნიერო შრომების კრებული, „აღმოსავლეთმცოდნეობის მაცნე“ III (2020). მასში ასახულია აღმოსავლეთის ისტორიის, პოლიტიკის, არქეოლოგიის, ეთნოლოგიის, წყაროთმცოდნეობის, ენათმეცნიერებისა და ლიტერატურათმცოდნეობის მნიშვნელოვანი საკითხები.

ჰუმანიტარულ მეცნიერებათა ფაკულტეტის ქართული ფილოლოგიის სპეციალობის სტუდენტი ალექსანდრე მდინარაძე ფეხბურთში აჭარის პირველობის გამარჯვებულია (ტურნირი „მასტერ ლიგა“). გამარჯვებულ გუნდში მას მეკარის პოზიცია აქვს. ვულოცავთ მას და ვუსურვებთ წარმატებებს მომავალშიც!

მეგი ქამაშიძე ჰუმანიტარულ მეცნიერებათა ფაკულტეტის ქართული ფილოლოგიის სტუდენტია. მიმდინარე სასწავლო წელს, როგორც გაცვლითი პროგრამის კონკურსში გამარჯვებული, „ერაზმუს+“-ის პროგრამის ფარგლებში, იგი სწავლას საფრანგეთში აგრძელებს, ლიონში - Université lumière lyon 2 - სადაც ეუფლება ინგლისურ ენასა და ლიტერატურას, ასევე ფრანგულ ენას ლიონის უნივერსიტეტის ენების ფაკულტეტზე. სწავლა ლიონის უნივერსიტეტშიც ონლაინ მიმდინარეობს. მეგი ქამაშიძეს ფრანგმა პროფესორებმა უკვე გაუწიეს რეკომენდაცია, რომ მეორე სემესტრშიც განაგრძოს სწავლა საფრანგეთში.

ბსუ-ს ჰუმანიტარულ მეცნიერებათა ფაკულტეტის ინგლისური ფილოლოგიის საგანმანათლებლო პროგრამის მეოთხე კურსის წარჩინებული სტუდენტი, სახელმწიფო სტიპენდიანტი თედო შარადენიძე, დამხმარე სახელმძღვანელოს ავტორია ინგლისურ ენაში.

თამთა სალაძე ბათუმის შოთა რუსთაველის სახელმწიფო უნივერსიტეტის ჰუმანიტარულ მეცნიერებათა ფაკულტეტის თარგმანმცოდნეობის სპეციალობის წარმატებული სტუდენტია. მესამე კურსის მეორე სემესტრში მონაწილეობა მიიღო „ერაზმუს+“-ის გაცვლით პროგრამაში, გაიმარჯვა კონკურსში და სწავლა განაგრძო რუმინეთში, შტეფან ჩელ მარეს სახელობის უნივერსიტეტში.