პროფესორმა ჯოანა შერშუნოვიჩმა ჰუმანიტარულ მეცნიერებათა ფაკულტეტის სტუდენტებისათვის ორი საჯარო ლექცია წაიკითხა თემებზე: „ეთნიკური სტერეოტიპები ფრაზეოლოგიაში (Ethnic Stereotypes Reflected in Phraseology: A Contrastive Perspective)“ და „ლაკუნარობის ფენომენის ლინგვო-კულტურული კვლევა (The Phenomenon of Lacunarity in Linguo-Cultural Research)“. პოლონეთის ბიალასტოკის უნივერსიტეტის პროფესორი ფრაზეოლოგიის საკითხებზე და კვლევის თანამედროვე მეთოდებზე მუშაობს. პოლონელი მკვლევარი ფრაზეოლოგთა საერთაშორისო საზოგადოების ევროფრაზის სამეცნიერო საბჭოს წევრი და ფრაზეოლოგიის კონტინენტშორისი სამეცნიერო გრანტის ხელმძღვანელია. პროფესორ ჯოანა შერშუნოვიჩს გამოცემული აქვს ასზე მეტი ნაშრომი, მათ შორის ორი სახელმძღვანელო.

ბათუმის შოთა რუსთაველის სახელმწიფო უნივერსიტეტის ჰუმანიტარულ მეცნიერებათა ფაკულტეტის ორგანიზებითა და აჭარის არ განათლების, კულტურისა და სპორტის სამინისტროს მხარდაჭერით საერთაშორისო კონფერენცია „ჰუმანიტარული მეცნიერებები ინფორმაციულ საზოგადოებაში - II“ გაიხსნა. ორდღიანი კონფერენცია 13 სექციაში იმუშავებს და მასში 350-მდე ქართველი, ინგლისელი, ფრანგი, გერმანელი, ამერიკელი, რუსი, პოლონელი, აზერბაიჯანელი, ავსტრიელი, თურქი, ირანელი პროფესორ-მასწავლებელი და მკვლევარი მოხსენებას წარმოადგენს ჰუმანიტარული მეცნიერებების აქტუალურ პრობლემებზე. საერთაშორისო სამეცნიერო სესიის მონაწილეები განიხილავენ ინფორმაციულ საზოგადოებაში ჰუმანიტარული მეცნიერებების ახალ გამოწვევებს და ბოლო პერიოდში წარმოებული კვლევის შედეგებს.

ამერიკელმა პროფესორმა ჯეიმს თორსონმა ბათუმის შოთა რუსთაველის სახელმწიფო უნივერსიტეტის ჰუმანიტარულ მეცნიერებათა ფაკულტეტის ინგლისური ფილოლოგიის სპეციალობის სტუდენტებისა და პროფესორ-მასწავლებლებისათვის საჯარო ლექცია ჩაატარა თემაზე: „კლასიკური ამერიკული დრამა (Classic American Drama: Eugene O’Neill, Tennessee Williams, and Arthur Miller)“. ნიუ მექსიკოს უნივერსიტეტის ემერიტუს პროფესორმა ისაუბრა ამერიკული დრამის საუკეთესო წარმომადგენლებზე იუჯინ ონილზე, ტენესი უილიამსზე და ართურ მილერზე. ლექციის დასასრულს, პროფესორმა ჯეიმს თორსონმა დასმულ შეკითხვებს უპასუხა.

საქართველოს მეცნიერებათა აკადემიის აკადემიკოსმა ელგუჯა ხინთიბიძემ ბათუმის შოთა რუსთაველის სახელმწიფო უნივერსიტეტის სტუდენტებისა და პროფესორ მასწავლებლებისათვის საჯარო ლექციების ციკლი წაიკითხა. ღვაწლმოსილმა პროფესორმა სამი დღის განმავლობაში ყურადღება გაამახვილა ისეთ მნიშვნელოვან საკითხებზე, როგორიცაა: „ვეფხისტყაოსანი“ შუასაუკუნებრივი და რენესანსული აზროვნების კონტექსტში, „ვეფხისტყაოსნის“ სიყვარული - ახალი ფილოსოფიური კონცეფცია (ტრუბადურები, დანტე, პეტრარკა) და „ვეფხისტყაოსანი“ შექსპირის ეპოქაში და მისი თანამედროვე დრამატურგიის ლიტერატურული წყარო. ფილოლოგიის დოქტორის, პროფესორ ელგუჯა ხინთიბიძის კვლევის საგანია შუასაუკუნეების ქართული ლიტერატურა და ქართულ-ბიზანტიური ლიტერატურული ურთიერთობები, რუსთველოლოგია და წყაროთმცოდნეობის დარგები. საჯარო ლექციები აჭარის ა.რ. განათლების, კულტურისა და სპორტის სამინისტროს “უმაღლესი განათლების ხელშეწყობის პროგრამის” ფარგლებში გაიმართა.

9-დან 12 სექტემბრის ჩათვლით, პარიზის სორბონის უნივერსიტეტში ჩატარდა საერთაშორისო სამეცნიერო კოლოკვიუმი ,,EUROPHRAS 2014 - ფრაზეოლოგია: რესურსები, აღწერა და მონაცემთა დამუშავება’’. სამეცნიერო ღონისძიებაში მონაწილეობდნენ ბათუმის შოთა რუსთაველის სახელმწიფო უნივერსიტეტის ჰუმანიტარულ მეცნიერებათა ფაკულტეტის პროფესორები: ნანა სტამბოლიშვილი, ნატალია სურგულაძე, მარინე სიორიძე, ანზორ აბუსერიძე, მაია კიკვაძე, რომლებიც წარმატებით წარსდგნენ მსოფლიოს წამყვანი უნივერსიტეტების ცნობილ მეცნიერებთან ერთად საინტერესო მოხსენებებით ფრაზეოლოგიური კვლევების სხვადასხვა სფეროში. ბათუმის შოთა რუსთაველის სახელმწიფო უნივერსიტეტის პროფესორები საერთაშორისო ფორუმში აჭარის ავტონომიური რესპუბლიკის განათლების, კულტურისა და სპორტის სამინისტროს „უმაღლესი განათლების ხელშეწყობის“ პროგრამის დაფინანსებით მონაწილეობდნენ.