დასრულდა საერთაშორისო სამეცნიერო კონფერენცია „ბიზანტინოლოგია საქართველოში - 5“. კონფერენციის დახურვას საბერძნეთის ელჩი საქართველოში დიმიტრის კარაბალისი დაესწრო. გაიმართა ბსუ-ს პროფესორ-მასწავლებელთა მონოგრაფიის „პონტოელი ბერძნები აჭარაში - წარსული და თანამედროვეობა"ფარგლებში მოპოვებული აჭარაში მცხოვრებ ბერძენთა ყოფის ამსახველი ფოტოგამოფენა. „შავი ზღვა და შავიზღისპირეთის ქვეყნები-კულტურათა და ცივილიზიაციათა გზაჯვარედინი IV-XV საუკუნეებში“ - ამ თემაზე კონფერენცია ბსუ-ში სამი დღე მიმდინარეობდა, რომელშიც ქართველი, ამერიკელი, გერმანელი, ინგლისელი, თურქი, ბერძენი მკვლევარები და უცხოელი ქართველოლოგები მონაწილეობდნენ.

ბათუმის შოთა რუსთაველის სახელმწიფო უნივერსიტეტში ლიონის უნივერსიტეტის კურსდამთავრებულმა, თავისუფალმა მთარგმნელმა ირაკლი ყოლბაიამ ლექციას წაიკითხა თემაზე: „ახალი ამერიკული პოეზია 1950-იანი წლებიდან დღემდე“. ლექციის თემატიკა სათავეს ამავე სახელწოდების საეტაპო ანთოლოგიით იღებს. ანთოლოგია 1960 წელს გამოსცა დონ ალენმა, რომელმაც ჯერ განსაზღვრა, შემდეგ კი მრავალმხრივ განაპირობა ექსპერიმენტული პოეზიის ლანდშაფტი ამერიკაში.

ბათუმის შოთა რუსთაველის სახელმწიფო უნივერსიტეტში საერთაშორისო სამეცნიერო კონფერენცია ბიზანტინოლოგია საქართველოში - 5 გაიხსნა თემაზე: „შავი ზღვა და შავიზღვისპირეთის ქვეყნები - კულტურათა და ცივილიზაციათა გზაჯვარედინი IV-XV საუკუნეებში“. სამდღიანი კონფერენციის მიზანია თანამედროვე ბიზანტინოლოგიასა და ზოგადად ჰუმანიტარულ მეცნიერებებში არსებული ახალი მიმართულებებისა და კვლევების უახლესი, ინოვაციური მეთოდების, ციფრული ჰუმანიტარიის მიღწევების წარმოჩენა და მათი პოპულარიზება საქართველოში. 110 ქართველი, ბერძენი, გერმანელი, ინგლისელი, ამერიკელი და თურქი მკვლევარი სამეცნიერო მოხსენებებს წარმოადგენს შემდეგ რვა სექციაში: ისტორია, წყაროთმცოდნეობა; ხელოვნების ისტორია, არქიტექტურა, არქეოლოგია, ნუმიზმატიკა; ენა და ლიტერატურა; კოდიკოლოგია, ტექსტოლოგია, თარგმანი და ფილოსოფია, რელიგია, თეოლოგია.

ცნობილი ბელგიელი მწერლის ჟორჟ სიმენონის ვაჟი ჯონ სიმენონი ბათუმის შოთა რუსთაველის სახელმწიფო უნივერსიტეტს ეწვია. ჯონ სიმენონმა სტუდენტებთან და პროფესორ-მასწავლებლებთან გამართულ შეხვედრაზე მამის ბათუმში მოგზაურობის ისტორია გაიხსენა და მხატვრულ ნაწარმოებებზე „ხალხი მოპირდაპირე მხარეს“ ისაუბრა, სადაც მოქმედება ზღვისპირა ქალაქში ხდება. ჟორჟ სიმენონი ბათუმს 1933 წელს შავი ზღვის გარშემო საკრუიზო მოგზაურობის დროს ეწვია. ბელგიელი მწერალი 200-მდე რომანისა და ნოველის ავტორი გახლავთ, რომლის შემოქმედებაც 47 ენაზეა თარგმნილი. შეხვედრის დასასრულს ჯონ სიმენონმა სამომავლო თანამშრომლობის შესაძლებლობებზე ისაუბრა და სტუდენტების შეკითხვებს უპასუხა.

4-6 ოქტომბერს, ოდესაში, „ჰორიზონტ 2020-ის“ საგრანტო პროექტის „ცოდნის და აკადემიური კულტურის მიმოცვლა ჰუმანიტარულ მეცნიერებებში: ევროპა და შავი ზღვის რეგიონი, XVIII ს. მეორე ნახევარი - XXI საუკუნე“ ეგიდით გამართულ საერთაშორისო კონფერენციაში მონაწილეობა მიიღეს ბათუმის შოთა რუსთაველის სახელმწიფო უნივერსიტეტის პროფესორ-მასწავლებლებმა: თამარ სირაძემ, მარინე აროშიძემ, მანუჩარ ლორიამ, დალი დობორჯგინიძემ და დოქტორანტმა ანასტასია მახარაძემ. კონფერენციის ფარგლებში გაიმართა საგრანტო პროექტის სამუშაო შეხვედრა და დაიგეგმა მეორე საზაფხულო სკოლის „თარგმანის როლი მეცნიერების განვითარებაში - 2020“ ბათუმის შოთა რუსთაველის სახელმწიფო უნივერსიტეტში ჩატარება.