დიგიტალური ჰუმანიტარიის მე-8 საერთაშორისო საზაფხულო სკოლის „დიგიტალური ქართველოლოგია და კავკასიოლოგია“ ფარგლებში ბათუმის შოთა რუსთაველის სახელმწიფო უნივერსიტეტში საერთაშორისო ვორკშოფი გაიმართა დოკულინგვისტიკისა და კორპუსლინგვისტიკის საკითხებზე. ევროპელმა ექსპერტებმა, ფრანკფურტის უნივერსიტეტის ემპირიული ენათმეცნიერების ინსტიტუტის დირექტორმა, გერმანელმა კავკასიოლოგმა, პროფესორმა იოსტ გიპერტმა და იენის უნივერსიტეტის კავკასიოლოგიის დეპარტამენტის ხელმძღვანელმა, პროფესორმა დიანა ფორკერმა ლექციები წაიკითხეს თემებზე: „ტექსტის კორპუსი, როგორც ისტორიული კვლევის საფუძველი“ და „კავკასიური ენების დიგიტალური ლექსიკონები“.

ბათუმის შოთა რუსთაველის სახელმწიფო უნივერსიტეტში მე-8 საერთაშორისო საზაფხულო სკოლა გაიხსნა დიგიტალურ ჰუმანიტარიაში თემაზე: „დიგიტალური ქართველოლოგია და კავკასიოლოგია“. ერთკვირიანი სკოლის ფარგლებში ქართველი და უცხოელი პროფესორები ლექციებს წაიკითხავენ დიგიტალური ქართველოლოგიისა და კავკასიოლოგიის, როგორც ახალი მიმართულების განსაზღვრის და თეორიული ჩარჩოს ჩამოყალიბების, კვლევის თანამედროვე მეთოდებისა და მულტიდისციპლინური რესურსების შესაქმნელად საჭირო ინსტრუმენტების გაცნობა-ათვისებას საკითხებზე.

ბათუმის შოთა რუსთაველის სახელმწიფო უნივერსიტეტში შეხვედრა გაიმართა ფერეიდანელ ქართველებთან. შაჰრამ ონიკაძემ, ომის (ამირან) გოგონანიმ და ისმაილ რაჰიმიმ სტუდენტებს, პროფესორ-მასწავლებლებსა და საზოგადოების წარმომადგენლებს ფერეიდანში მცხოვრებ ქართველთა მიღწევები, ცხოვრების წესი, იქ არსებული ქართული ტრადიციები და წეს-ჩვეულებები გააცნეს. სტუმრებმა ერთი თვის განმავლობაში დაახლოებით 1500 კილომეტრი გაიარეს და ფერეიდანიდან საქართველოში ფეხით ჩამოვიდნენ. XVII საუკუნის დასაწყისში ირანის შაჰმა აბას I-მა საქართველოდან ორასი ათასი ქართველი აყარა და სპარსეთის მიწაზე დაასახლა. ფერეიდანელმა ქართველებმა დღემდე შეინარჩუნეს ეროვნული თვითშემეცნება და ქართული ენა. ირანიდან საქართველომდე ფეხით გავლილი გზა ქართველთა 400 წლის წინანდელი ტრაგედიის სიმბოლური გამოძახილია.

ბათუმის შოთა რუსთაველის სახელმწიფო უნივერსიტეტის ჰუმანიტარულ მეცნიერებათა ფაკულტეტის დეკანი მარინა გიორგაძე და პროფესორ-მასწავლებლები პირველკურსელებს შეხვდნენ, სტუდენტობა მიულოცეს და წარმატებები უსურვეს. სტუდენტები შეხვედრაზე უმაღლესი საგანმანათლებლო დაწესებულების ძირითად მარეგულირებელ აქტებს, საგანმანათლებლო პროგრამების განხორციელებისა და სტუდენტთა აკადემიური შეფასების წესებს, ელექტრონული სერვისებსა და პროექტებს გაეცნენ.

ბათუმის შოთა რუსთაველის სახელმწიფო უნივერსიტეტის ჰუმანიტარული ფაკულტეტის პროფესორებმა მონაწილეობა მიიღეს 11-13 სექტემბერს, იტალიის რომის „რომი ტრეს“ უნივერსიტეტში გამართულ ფრაზეოლოგიისა და პარემიოლოგიის საერთაშორისო ორგანიზაციის „ფრაზისის“ კონგრესში. პროფესორებმა ნატალია სურგულაძემ, ირინე გოშხეთელიანმა, ნანა სტამბოლიშვილმა, ასოცირებულმა პროფესორმა მაია კიკვაძემ და ფილოლოგიის დოქტორმა ანზორ აბუსერიძემ კონგრესზე მოხსენებები წარადგინეს დარგის აქტუალურ საკითხებზე. ღონისძიებაში მონაწილეობდა მსოფლიოს ცნობილი ლინგვისტები საქართველოდან, გერმანიიდან, ამერიკიდან, საფრანგეთიდან, იაპონიიდან, ესპანეთიდან, რუსეთიდან, უკრაინიდან, ბრაზილიიდან და სხვა ქვეყნებიდან. კონგრესი მიზნად ისახავდა აკადემიური პირების დაახლოებას, აზრთა გაცვლას და ინტერნაციონალიზაციის ხელშეწყობას.