21-26 აპრილს ტრაპიზონში მეორედ გაიმართა ტრადიციული საერთაშორისო ლიტერატურული ფესტივალი, რომელშიც საქართველოს, თურქეთის, რუსეთის, ირანისა და აზერბაიჯანის მწერლებმა, პოეტებმა და ლიტერატურათმცოდნეებმა მიიღეს მონაწილეობა. ყოველ მონაწილე ქვეყანას ფესტივალის ერთი დღე დაეთმო. ქართული ენისა და ლიტერატურის დღეს ქალაქმა სურმენემ უმასპინძლა. ქართულმა დელეგაციამ, რომელშიც შედიოდნენ ქუთაისისა და ბათუმის სახელმწიფო უნივერსიტეტების წარმომადგენლები, სურმენეს კულტურის ცენტრში შეკრებილ საზოგადოებას გააცნეს ქართული დამწერლობის, ლიტერატურისა და ქართულ-აღმოსავლური კულტურულ-ლიტერატურული ურთიერთობების ისტორია. ბსუ პროფესორმა რამაზ ხალვაშმა წაიკითხა მოხსენება თემაზე: „შოთა რუსთაველი და მისი „ვეფხისტყაოსანი“.

ჰუმანიტარულ მეცნიერებათა ფაკულტეტის ოთხმა სტუდენტმა მონაწილეობა მიიღო ივანე ჯავახიშვილის სახელობის თბილისის სახელმწიფო უნივერსიტეტის კლასიკური ფილოლოგიის, ბიზანტინისტიკისა და ნეოგრეცისტიკის ინსტიტუტის სტუდენტთა III სამეცნიერო კონფერენციის - „ანტიკურობის თანამედროვეობა“ - მუშაობაში. ზვიად ჩხენკელმა კონფერენციაზე მოხსენება წარადგინა თემაზე: გონიო - აფსაროსის 2016 წლის ექსპედიციის შედეგები (ხელმძღვანელი, პროფ. შ. მამულაძე), ლუკა ლელაძემ - მითოსური სიუჟეტები ანტიკური ხანის კერამიკაზე, ბათუმის მუზეუმების მასალების მიხედვით (ხემძღვანელი, პროფ. მ. გიორგაძე), მარიკა გამახარიამ - არისტოტელეს მოძღვრება სულის შესახებ და მისი რეცეფცია შუა საუკუნეების ინტელექტის თეორიებში (ხელმძღვანელი: პროფ. ლ. ზაქარაძე) და
თათია დავითაძემ - კოსმოგონიური მითოსი ქართულ ფოლკლორში (ხელმძღვანელი: პროფ. თ. შიოშვილი). სტუდენტთა სამეცნიერო კონფერენციის მონაწილეებს სერტიფიკატები და სამახსოვრო საჩუქრები გადაეცათ.

ბათუმის შოთა რუსთაველის სახელმწიფო უნივერსიტეტი პროექტის „უნივერსიტეტის ფართო საზოგადოებისთვის’’ ფარგლებში აბიტურიენტებისათვის ზოგადი უნარების იმიტირებულ გამოცდებს მართავს. ერთიანი ეროვნული გამოცდების იმიტირებული ტესტირება ბსუ-ს საგამოცდო ცენტრში მიმდინარეობს და აჭარის რეგიონის 400-მდე აბიტურიენტი მონაწილეობს. ტესტირების მიზანი აბიტურიენტების ერთიანი ეროვნული გამოცდებისათვის მომზადება წარმოადგენს.

დღეს, ბათუმის შოთა რუსთაველის სახელმწიფო უნივერსიტეტში ივანე ჯავახიშვილის სახელობის თბილისის სახელმწიფო უნივერსიტეტის პროფესორის, ლექსიკოგრაფიული ცენტრის სამეცნიერო ხელმძღვანელის თინათინ მარგალიტაძის საჯარო ლექციათა ციკლი დაიწყო. პირველი მოხსენება თანამედროვე ქართულ ენაში მიმდინარე პროცესებსა და მშობლიური და უცხო ენების სწავლების მეთოდოლოგიას შეეხებოდა. თინათინ მარგალიტაძემ მოძრაობის "არა ბარბარიზმებს" ფარგლებში შექმნილი ინგლისურენოვანი ბარბარიზმების ელექტრონული ლექსიკონი წარუდგინა დამსწრე საზოგადოებას. შემდეგი მოხსენება „სიტყვის მნიშვნელობა და მისი სწავლებისა და კვლევის მეთოდები’ ’ ბსუ-ში, ხვალ,12:00 საათზე გაიმართება.
თინა მარგალიტაძის საჯარო ლექციათა ციკლი ბსუ-ში აჭარის ა.რ განათლების, კულტურისა და სპორტის სამინისტროს უმაღლესი განათლების ხელშეწყობის პროგრამის ფარგლებში გაიმართა.

ბსუ-ს ჰუმანიტარულ მეცნიერებათა ფაკულტეტზე ევროპის დღე აღინიშნა. ღონისძიების ფარგლებში ევროპეისტიკის, სლავისტიკის და ქართული ფილოლოგიის დეპარტამენტებმა საინფორმაციო კუთხეები მოაწყვეს ევროპის ქვეყნების შესახებ. ასევე საინფორმაციო კუთხე წარმოადგინეს ბსუ-ს სტრატეგიული განვითარებისა და საგარეო ურთიერთობათა დეპარტამენტმა, ნატოსა და ევროკავშირის შესახებ საინფორმაციო ცენტრმა და საერთაშორისო განათლების ცენტრის ბათუმის ოფისმა. „ვკითხულობთ შექსპირს“ - ამ სახელწოდებით სტუდენტებმა და პროფესორ-მასწავლებლებმა შექსპირის სონეტები წაიკითხეს სხვადასხვა ევროპულ ენაზე. ევროპული დღეების ეგიდით, ფილოსოფიის მეორე კურსის სტუდენტმა მარიკა ბოლქვაძემ წარდგინება გამართა ევროპულ იდენტობაზე, რომლის დასრულების შემდეგ, მუსიკალური ნომრები შეასრულეს ქართველმა და უცხოელმა სტუდენტებმა.