11-15 აპრილს, შვეიცარიის ქალაქ ლოზანაში ჩატარდა ევროპის იურიდიული ფაკულტეტების ასოციაციის ყოველწლიური კონფერენცია და სამუშაო შეხვედრა. ბათუმის შოთა რუსთაველის სახელმწიფო უნივერსიტეტის იურდიული და სოციალურ მეცნიერებათა ფაკულტეტი აღნიშნულ ღონისძიებაზე წარმოადგინა ფაკულტეტის დეკანმა, პროფესორმა ლევან ჯაყელმა. კონფერენცია და სამუშაო შეხვედრები მიეძღვნა იურიდიული განათლების თანამედროვე გამოწვევებს, კერძოდ სამართლის სკოლების როლს კლიმატური ცვლილებების შესწავლაში, ტექნოლოგიური მიღწევების საგანმანათლებლო სფეროში გამოყენების (Chat gpt), მათი მართვის, ქსელების იურიდიული განათლების მიზნებისთვის გამოყენების, სამართლის ამერიკულ და ევროპულ სკოლებში უცხოური სამართლის სწავლების, იურიდიული განათლებაში ინტერდისციპლინური კომპონენტების ინტეგრირების აქტუალურ საკითხებს.

აუტიზმის შესახებ ცნობადობის ამაღლების საერთაშორისო კვირეულთან დაკავშირებით, საქართველოს განათლებისა და მეცნიერების სამინისტროს მულტიდისციპლინური გუნდის წევრმა, ბსუ-ს მოწვეულმა სპეციალისტმა ციალა ტუღუშმა და ბსუ-ს იურიდიული და სოციალურ მეცნიერებათა ფაკულტეტის ფსიქოლოგიის მიმართულების სტუდენტებმა მარიამ მახარაძემ და მარი ფარტენაძემ საინფორმაციო შეხვედრა გამართეს. მომხსენებლებმა ისაუბრეს აუტიზმის მსოფლიო დღის მნიშვნელობაზე, აუტიზმის ნიშნებისა და სიმპტომების, მისი ადრეული დიაგნოსტირების მეთოდიკის, M – CHAT - R სკრინინგ კითხვარის, აუტიზმის გამომწვევი მიზეზებისა და რისკ–ფაქტორების საკითხებზე.

საქართველოს საკონსტიტუციო სასამართლოს წევრმა თეიმურაზ ტუღუშმა USAID-ის სამართლის უზენაესობის პროგრამის ფარგლებში სამართალმცოდნეობის საგანმანათლებლო პროგრამის სტუდენტებისათვის საჯარო ლექცია წაიკითხა თემაზე: „კონსტიტუციური კონტროლის სისტემა საქართველოში და საკონსტიტუციო სამართალწარმოების მნიშვნელოვანი ასპექტები“. თეიმურაზ ტუღუშმა საუბრისას ყურადღება გაამახვილა საკონსტიტუციო სასამართლოს ინსტიტუციურ მახასიათებლებზე და სასამართლოს როლზე მოქალაქეების ძირითადი უფლებების და თავისუფლებების დაცვის პროცესში.

ბსუ-სა და იაპონიის საელჩოს თანამშრომლობის ფარგლებში, იურიდიული და სოციალურ მეცნიერებათა ფაკულტეტის სამართალმცოდნეობის პროგრამის მეოთხე სასწავლო წლის სტუდენტმა მაგდა ხალვაშმა იაპონიის მთავრობის პროგრამაში „MIRAI” (Mutual understanding, Intellectual Relations and Academic exchange Initiative) მიიღო მონაწილეობა. მაგდა ხალვაში ეწვია იაპონიის საგარეო საქმეთა სამინისტროს, იაპონიის უზენაესს სასამართლოს, იუსტიციის სამინისტროს, კიოტოს უნივერსიტეტს, იურიდიულ კომპანიას “Nishimura&Asahi” და სხვადასხვა კულტურული მემკვიდრეობის ძეგლს. გაცვლითი პროგრამა მიზნად ისახავს კულტურათა გაცვლას, ინტელექტუალური დისკუსიებისა და მონაწილეთა დახმარებით იაპონიისა და პროგრამაში მონაწილე ქვეყნების დაკავშირებას.

ბათუმის შოთა რუსთაველის სახელმწიფო უნივერსიტეტი USAID-ის სამართლის უზენაესობის პროგრამის მხარდაჭერით ახორციელებს პროექტს: „აჭარის რეგიონში პრაქტიკული სამართლის სწავლების ხელშეწყობა“. პროექტის ფარგლებში იურიდიული და სოციალურ მეცნიერებათა ფაკულტეტის სამართალმცოდნეობის პროგრამის IV კურსის სტუდენტებმა პრაქტიკული სამართლის (Street Law) კლინიკის კოორდინატორის, ცირა კომახიძის ხელმძღვანელობით ხელვაჩაურის მუნიციპალიტეტის დაბა მახინჯაურის, სოფელ ერგეს, სოფელ სარფისა და სოფელ თხილნარის მინდია აბაშიძის სახელობის პირველ საჯარო სკოლაში სამართლებრივი გაკვეთილები ჩაატარეს თემაზე: „კონსტიტუცია და დემოკრატია“.